Thursday, April 17, 2008,10:34 PM
اه يا بلد .. اعتقلو اسراء عبد الفتاح
تحديث

الحمد لله اسراء خرجت النهاردة

سيادة وزير الداخلية تعطف وتكرم وسمح بقبول التماس اهلها اللى رايحين يعملو عمرة بكرة .., يعنى لما هى واخدة براءة ومفيش حاجة ضدها كنتو حابسينها ليه

بلد بتاعة التماسات صحيح

ربنا يحميكى يا بنتى ويبعد عنك عيون ولاد الكلب ومتتاخديش تانى

____________________________________________________________

اسراء الان معتقلة بدون وجه حق




هى دى الحرية يا بلد ؟؟




جالى الخبر ده عالفيس بوك امبارح :




هام وعاجل جداً وزارة الداخلية تصدر أمر اعتقال بحق إسراء عبد الفتاح ونادية جمال مبروك في ساعة متأخرة من مساء أمس النائب العام هو اللي أمر بالإفراج عنها ، ولكن سلطة النيابة والقضاء وسيادة القانون عموماً،ليست هي كل شيء فوزارة الداخلية تستطيع وفقاً لقانون الطواريء اللي وضعوه لحمايتهم اعتقال أي شخص دون أسباب ودون أن يكون متهماً بأي تهمة هو ده العدل وهي دي حرية التعبيرلو سألتوا ليهلأن هي دي مصر وهي دي الحكومة المصريةوهو ده قانون الطواريء




والله حاجة تغيظ فعلا .., البجاحة وصلت للدرجة دى


هى عملت ايه يعنى علشان ده كله ؟؟؟


_____________________



ده محمد الشرقاوى

محمد الشرقاوى ألقي القبض عليه في مدينة 6 أكتوبر يوم الإضراب ومن يومها وهو محجوز .., وغيره كتير وكتير مقبوض عليهم ومطلعوش من اهل المحلة

يا ترى احنا رايحين لفين ؟؟؟؟؟




 
Monday, April 14, 2008,9:54 PM
الحمد لله
الحمد لله تم إخلاء سبيل إسراء هى ومعظم اللى معاها وهى حاليا بتخلص الاجراءات وهتخرج يا اما النهاردة يا بكرة الصبح ان شاء الله
الخبر جالى من جروب التضامن مع اسراء وكمان سمعته فى برنامج الطبعة الاولى بتاع أحمد المسلمانى
نص الخبر بيقول :
هام وعاجل جداً، تم اليوم صباحاً قبول التظلم المقدم من أمير سالم المحامي للإفراج عن إسراء عبد الفتاح ونادية مبروك ، والنائب العام يأمر بإخلاء سبيلهما ،ومن المتوقع خروجهما اليوم عندما تنتهي الإجراءات ،ويبقي الوضع علي ماهو عليه بالنسبة لباقي محتجزي القاهرةومن ناحية أخري وفي الإسكندرية قبل الإستئناف الثاني المقدم من المحتجزين بالنسبة لهم جميعاًماعدا واحد و حكمت المحكمة بإخلاء سبيلهم ، ومن المتوقع خروجهم جميعاً اليوم فور انتهاء الإجراءات باستثناء واحد فقط
مبروك لاسراء ومبروك لينا
 
Thursday, April 10, 2008,1:41 AM
أرجوكم لا تتخلو عنها



إسراء عبد الفتاح أحمد راشد ..., لازم كلنا نفتكر الاسم ده كويس .., لازم كلنا نحفظ الاسم ده كويس.., نبدأ الحكاية من الأول ونقول مين هى إسراء وعملت ايه


.


إسراء عندها 28 سنة .., معاها ليسانس اداب .., عضوة فى حزب الغد وفى لجنة حقوق الانسان .., وهى اللى عملت الجروب المشهور عالفيس بوك والمتهم بانه دعا لاضراب 6 ابريل


.


انقلكم اللى قالته فى الجروب على لسانها :




انا قريت على النت وجتلى رسائل على الموبيل ان فى اضراب عام يوم 6 ابريل للاعتراض عن الغلاء المفرط والارتفاع الجنونى فى الاسعار ومن ناحية اخرى المرتبات والدخل ما بيتحركوش و مافيش ربط بينهم و بين الارتفاع الجنونى فى الاسعار وكأن الحكومة والبلد عايزنا نضرب دمغنا فى الحيط ......... عجبتنى الفكرة وفكرت ان احنا ممكن ندعم الفكرة باضراب عام عن الشراء نعمل اضراب عن شراء اى سلع فى اليوم ده وياريت منكنش سلبين ونشارك كلنا فى الاضراب بأى صوره من الصور


.




انا شايف ان كلنا معاها فى اللى عملته ده .., وكلنا مستعدين نعمله


الاضراب نجح فعلا وكان سابقة فى تاريخ مصر المعاصر .., اضراب اللى عمله الناس البسيطة والشباب اللى خايفين على بلدهم وبيحبوها لسه مع كل الظلم المحطوط عليهم


.


إسراء اتقبض عليها وتم حبسها 15 يوم على زمة التحقيق .., إسراء هتتحاسب على حاجة عملناها كلنا .., كلنا دعينا للاضراب وكتير مننا دعا للاضراب ده فى مدونته او بعت ايميلات لاصحابه .., اسراء مش صاحبة الفكرة .., وحتى لو هى صاحبة الفكرة ده مش معناه انه يتقبض عليها .., الكلام كان واضح جدا عن ان الاضراب سلمى وكنا بنقول اللى يشوف عسكرى امن دولة يديله وردة .., واللى حصل فى المحلة كان متدبر من الداخلية وكان بناءا على استفزازات امنية ليهم .., والدليل على كده استخدام الذخيرة الحية ودى حاجة مبتتعملش فى اى مظاهرة .., قنابل الدخان وصل بيهم انهم رموها جوه البيوت .., وكانو بيلمو الناس من الشوارع ويدخلوهم الاقسام


.


المطلوب مننا ايه دلوقتى .., اننا نقف جنب اسراء اللى عملت حاجة علشان خاطرنا كلنا .., مخافتش .., كان ممكن متحطش اسمها عالفيس بوك .., كان ممكن تعمل الجروب باسم وهمى .., انما اسراء كانت شجاعة جدا وكانت حاطة اسمها الرباعى .., وكانت عارفة ان أكيد ده هيحصلها


.


الجروب ده اتعمل لمساندة اسراء هى وزمايلها اللى اتقبض عليهم .. دوس عاللينك ده


لو سبناها تتحبس يبقى ننسى أى امل فى اننا نعمل حاجة بعد كده .., وننسى اننا نعمل اضرابات تانى .., لازم نقف جنب اسراء ونساعدها


كل اللى يسمع عن موضوعها ينشره لو عنده بلوج .., لو معندوش يبعته لاصحابه فى ايميل .., احكى لكل اللى تعرفه عنها .., اشترك فى الجروب اللى عالفيس بوك لمساندتها .., لو مقدرتش تعمل حاجة من كل ده .., ادعيلها ان ربنا يقف جنبها وتطلع لوالدتها بالسلامة






يا ريت بجد كل اللى يقدر يعمل حاجة يعملها .., مش عايزين اسراء تتنسى وتبقى زى الى راحو فى الرجلين ولا حدش سأل عليهم



______________________



أنا عدلت حجم الصورة اللى فوق علشان ينفع تبقى بانر نعلقه كلنا فى مدوناتنا والبانر اهو


لا تتخلو عنها

 
Saturday, April 5, 2008,11:09 PM
المدونة مشاركة فى إضراب 6 ابريل

 
posted by zordeak
Permalink ¤