Sunday, February 25, 2007,9:27 PM
عماااار يا مصر ..قالهم مش هحرس الصهاينة ..حبسووه


محمد خلف حسن ابراهيم
راجل بسيط عنده 38 سنة .., بس لسه عنده مبادىء
ولسه بيحب مصر
ولسه عنده فطرة سليمة تخليه يقول لأ
انا مش هحرس الصهاينة ولاد الكلب اللى قتلو أهلى
.
.
.
محمد رفض أمر صادر ليه بتكليفه بحراسة السفارة الإسرائيلية
.
محمد أضرب عن الطعام علشان مينفذش الأمر ده
.
اتنقل للمستشفى بعد اضرابه عن الطعام
.
رااااااااااااجل
.
ويا ترى عملو ايه مع محمد ؟
.
.
.
اتحكم عليه النهاردة الأحد ..بالسجن ستة شهور
.
.
انا مش عارف أقول ايه
فعلا انا مصدوم
.
مبسوط أوى اوى بقدرة محمد البسيط انه يقول لأ
ومصدوم من رد الفعل
.
.
محمد لو اتسجن فعلا
.
.
يبقى طــظ فينا كلنا
.
.
انا بدعو أى حد يشوف الخبر ده انه يكتب عنه فى مدونته
ويا ريت لو حد يقدر يصمم بانــر لمساندة محمد .., يصممه
.
.
لو سكتنا على اللى بيحصل ده .., هييجى وقت يخلو كل واحد فينا يفتح بيته للصهاينة
ونقولهم تعالو
.
.
اركبووووووووووووووونا
.
.
دوس هنا علشان تشوف الخبر كامل
 
Thursday, February 22, 2007,3:44 PM
كوز المحبة اتخرم ..ولبست تاج محترم
ازيكم يا معلمييين
أولا
انا بحب أشكر كل الأصدقاء اللى نصحونى فى البوست اللى فات
واللى حسسونى فعلا بمشاركتهم
وحسسونى كمان اننا اهل فعلا
بجد شكرا
ثانيا
أجاوب بقى التاج اللى عليا
الواحد مبيعرفش ينام لما بيكون مبعوتله تاج ولسه معملوش.., بيحس انه مديون لحد
وبعدين فكرت لو الواحد مات وهو عليه تاج يبقى ايه العمل ساعتها .., اللى بعتلى التاج يجيلى يوم القيامة وياخد من حسناتى ويدينى من سيئاته .., لا شكراا .., انا مش ناقص
وبعدين انجى بقت بتجيلى فى المنام .., لابسة اخضر فى أصفر .., شبه لعيبة البرازييل
وتبرقلى جامد .., وتقولى انت معملتش التااج يا سلطااان ؟؟
وبعدين الاقى النجفة اللى فى سقف الحلم تتهز .., واسمع فى الخلفية الأغنية الشبابية المشهورة
الدوور الدووور ..الدووور الدوور .., موعودة ياللى عليكى الدوور
وتقرب انجى اكتر .., وبصوت شريير تقولى ..اشربى يا شااابة
اقووم مفزووع من النوم وانا بقوول لاااااا يا انجى لااااااااااااااا
علشان كده قلت اجاوب التاج بسرعة
قبل ما يجيلى انهيار عصبى
التاج اللى لبسته المرة دى برضه من العزيزة انجى سمراء النــيل بيقوول
اسم مدونتك؟
مع نفسى
لماذا اخترته.. ماذا تقصد به؟
اممممم .., بص يا سيدى .., هوا المفروض الاسم واضح ومبين نفسه .., انا عايز ابقى مع نفسى .., أعيش براحتى .., اكتب اللى نفسى فييه ..فى اى وقت .., من غير ما احدد اتجاه معين اكتب فيه .., كل اللى يطلع فى دماغى اكتبه .., حاجة ليا انا .., اكون مبسوط وانا بعملها ..بس
هل فكرت في إغلاق المدونة.. والسبب؟
الصراحة .., اه فكرت .., السبب .., علشان الوقت .., يمكن انا لما دخلت فى عالم المدونات .., عشت فيه أوى .., وحبيته أوى .., وبقيت اقضى وقت كتيير جدا فيه .., وقت المذاكرة قل .., وقت القراية قل .., بس ان شاء الله هحاول أظبط الحكاية دى
صورتك فى المدونة ..رمزيتها ؟
هيا صورة غريبة .., لحصان .., كريستال .., انا كنت بجرب أعمل أبلود لأى صورة ودى الصورة اللى جت فى وشى ساعتها .., كسلت أغيرها .., بس اتعودت عليها .., يمكن اغيرها قدام .., بس لسه معرفش .., براحتى بقى .., مش مع نفسى
طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
منا لسه بقول اهو
أى حاجة وكل حاجة
كتبت فيها قصص
اتكلمت عن نفسى كتيير
لسه ناوى اكتب سياسة .., بس صراحة مخنوق من حال البلد .., وانا لما ببقى قرفان .., بمتنع عن الكتابة علشان بخرف وبشتم
لماذا تدون أصلا ؟
وانت مالك
انت مالك حشرى ليه كده
بدون علشان انا عايز ادون
واهو مكان اقدر اكتب فيه افكارى
احساسى ..وجهة نظرى فى اى حاجة
وبس
أحلى جملة قيلت لك فى وصف مدونتك ؟
انها مختلفة
غريبة
ملهاش نمط معين زى اى مدونة
وده فرحنى لان ده هدفى
اللا نمطية
التعليقات بالنسبة لك ..أهميتها ؟
أكيد طبعا التعليقات مهمة
اكيد بحب ادخل واشوف مين الى شاركنى فى افكارى .., ومين اللى عاجبه كلامى ., ومين اللى مش عاجبه كلامى
كنت فكرت صراحة انى اشيل التعليقات خالص
بس حسيت انى هفقد التواصل
والتواصل ده جزء مهم اوى من عالم التدوين
أحلى بوست كتبته ..ضع اللينك ..ثم اذكر لماذا ؟
بصراحة انا حابب كل بوستاتى
كل كلمة قلتها حاببها
وحاسس بيها
بس يمكن قصة تفاصيل ليها معزة خاصة
لانها كانت اول بوست ابدأ بيه
لو عايزين تشوفوها هيا فى الارشيف
أفضل مدونة قرأتها ..يمكن اختيار عدة مدونات ؟
بص يا كابتن
فيه فى جنب المدونة كده شوية لينكات
دول احسن ناس انا اعرفهم
واحسن ناس انا بقرالهم
خش عندهم واحد واحد
هتعرف انى عندى حق اكيد
أفضل بوست قرأته ..يمكن اختيار اكتر من لينك ؟
لا طبعا مفتكرش
فيه بوستات كتيير اوى بتعجبنى
وبعدين احنا بنتكلم هنا عن بنى ادمين بتقول اللى جواها
لما الحاجة دى بتتقال بصراحة وبصدق
بتبقى احسن حاجة فى الدنيا
؟هل خسرت صديق بسبب كتابة هنا
مفتكرش
واتمنى ان ده ميحصلش
حد قل ادبه فى التعليق ..ايه رد فعلك ؟
محصلش قبل كده الحمد لله
بس لو حصل وكان كلام خارج
همسح تعليقه طبعا
انما لو حد بينتقد اسلوبى او وجهات نظرى
هو حر
يقول اللى هو عايزه
احنا فى بلد ديموقراتى يا كابتن
:)أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
مش عارف
انا لما المدونة مبتعجبنيش
بقفلها على طوول
ومتعلقش فى دماغى
بس يمكن المدونات اللى بتشتم فى الدين عامة .., ومدونات الملحدين .., مبيعجبنيش تفكيرهم .., ولا بيعجبنى رفضهم للدين لمجرد انهم عايزين يكونو احرار
أسوأ بوست ؟
ايه الغلاسة دى
انا قلت رأيى فوق
أسوأ مدون ..مهو هتجاوب هتجاوب ؟
غوور ياض من هنا
انت شكلك بتلعب فى عداد عمرك
وانا بتخنق بسرعة
يللا غوور
مقلنا الناس الوحشة انا معرفهمش
اللى اعرفهم بس الحلوين الجدعان
ايه التاج الطويييييييييييييل ده
أمرره لمين بقى ؟
كالعادة للمتكاظين
rivendellسهاااا
منال البيدا
عمرو عايزها انثى
أشرف أخف دم
ياسمين الانسانة
مرام ما علينا
بسووم وحكاوى وتخاريف
علا توهه
شيمااء
منة خبث
اسراء لؤم
تسنيم أختهم
امانى سهر الليالى
ميموو المفروسة
كلبوزة بس سمباتيك
وينكى
محمد سوبر نوفا
نهى محمود وكراكيبها
hebaz
نوارة جبه التهييس الشعبية
يا مراكبى
سورى لو كنت نسيت حد
بس كل اللى يشوفه يجاوب
وشكرا
 
Tuesday, February 6, 2007,10:47 PM
شــــط إسكندرية


تعلمت كلما مررت بضيق أو احسست بالملل من كثرة المذاكرة .., أو شعرت بالضغط العصبى ..أن أذهب إلى الاسكندرية .., وحدها تعيدنى إلى نفسى .., تشعرنى بالهدوء.., تمسح بيدها الحانية على رأسى .., وتخبرنى بأن الأفضل موجود .., وبأن أمامى الكثير من الأمل




يحذرنى الجميع

يابنى الجو برد
هتعمل ايه هناك .., الدنيا هتكون بتمطر
دول قفلو المينا .., ومفيش مراكب فى المية من الموج العالى
أنت عايز تروح فى النوة .., ايه العبط ده

لا يعلمون أنى هكذا أعشقها .., فى الشتاء

أذهب الى الاسكندرية بالامس أنا وأصدقائى

تستقبلنا فيروز بصوتها الدافىء ..شط إسكندرية..يا شط الهوا

تستقبلنا الاسكندرية برذاذ خفيف ينبىء بيوم ممطر




الصورة من شباك الاتوبيس..السماء مليئة بالغيوم





أعانقها بعينى .., فلقد أوحشتنى كثيرا



فى الصيف اشعر بالشفقة تجاهها .., اجتياح المصيفين يفقدها خصوصيتها .., تستعيد خصوصيتها وشخصيتها القوية فى الشتاء


نذهب إلى القلعة .., تبدأ الأمطار فى الهطول .., ننزل جميعا


أستمتع بالجو البارد .., فانا من عشاق الشتاء .., على الرغم من أن البرد يتعبنى كثيرا .., الا اننى احبه





لم نجد هناك الكثير من الناس .., ولكن كان هناك الكثير من القطط

سمحت لى هذه القطة بتصويرها




بعد قضاء بعض الوقت هناك .., والاستمتاع بمشاهدة طائر النورس بأعداده الغفيرة التى لم أراها من قبل .., يبدو أن السمك يكون قريبا من السطح وقت المطر .., ولذلك تتجمع طيور النورس وقت المطر لتستغل هذه الفرصة






نذهب بعدها إلى المنتزه .., نقضى الوقت فى لعب الكرة .., نلعب كما لو اننا عدنا الى الطفولة .., حين كنا نلعب تحت المطر .., تشتد الأمطار كثيرا فنضطر التوقف عن اللعب .., ملابسنا جميعاً مبتلة .., يرانا الناس .., يتعجبون من هؤلاء الحمقى الذين يلعبون تحت المطر







نذهب بعدها لجرين بلازا .., أبحث عن بعض الكتب التى كنت انوى شراءها .., لا أجدها بالطبع .., واتعجب من بائع الكتب حين اسأله عن اسم كاتب ما .., يبدو لى من الانطباع على وجهه اننى أتحدث عن مخلوق قادم من الفضاء .., يهز رأسه فى استغراب .., ثم يقول ..,مفـيـيـيـش




وفى وقت الغداء قررت أكل البيتزا التى أعشقها .., لم تعجبنى البيتزا هناك ..,لم أكمل نصفها وكنت اتمنى ان أرى الشيف هناك لأخنقه وأتخلص منه نهائيا حتى لا يعذب أحدا غيرى.., لذا من يذهب منكم إلى جرين بلازا .., فليتجنب البيتزا بأى وسيلة




نذهب بعدها الى محطة الرمل .., أتجول هناك .., أسترجع الكثير من الذكريات., أشعر بالتعب والحاجة لشرب القهوة نذهب الى المقهى البرازيلى بالرمل .., نشرب القهوة بالبندق التى اعشقها






مقهى راقى هو .., عريق جدا .., هناك منذ عام 1929 .., يستقبلنا رجلان كبيران فى السن .., هم من يحضّرون القهوة .., لا تفارق الابتسامة وجههم





نستمتع بالوقت هناك كثيرا .., ينتهى الشعور بالتعب مع اول رشفة من القهوة بالبندق العزيزة

أنا بالجاكت والكوفية السوداء.., والمدون الصديق أحمد عبد الشفيع ..متكاظى..بالبلوفر والكوفية البنية

نذهب بعدها الى سينما أمير .., عرض منتصف الليل

كنت اتمنى مشاهدة فيلم NIGHT AT THE MUSEUM

ولكن تم الغاؤه فى عرض منتصف الليل لنقص العدد

شاهدنا جميعا فيلم مطب صناعى .., أعجبنى الفيلم .., مع بعض الملاحظات التى لا يخلو منها فيلم عربى

بعد الفيلم غادرنا الاسكندرية .., وصلت الى البيت فى السابعة صباحا .., لأنام كما لم أنم من قبل

الرحلة كانت مليئة بالمدونين الأصدقاء

أسامة (soul)

..,عبدالشفيع (metkazy)

...( أحمد فتحى (ميليجى.

( عمرو (مورو

سها (غواص بحر الأمل

الاء (spore forming human )

جهاد (jeen )

( وعلا (توهه

 
Thursday, February 1, 2007,9:41 PM
يا بيه ..إحنا بتوووع التااااج
يا مساء الجمال
قاعد أنا لا بيا ولا عليا .., ألاقى العياال صحابى بيقولولى إلحق إلحق .., أنت جالك تاج
قلت لا إله الا الله .., ده أنا ماشى مستقييم وفى حالى ومبزعلش حد ., تكون دى اخرتى .., يجيلى تاج
قلتلهم وبييجى منين التاج ده .., يعنى هو حاجة أبيحة ؟؟.., قالولى روح انت وشوف.., دى إنجـــــــــــــى
هيا اللى بعتتهولك .., قلت بينى وبين نفسى .., وانا اللى كنت فاكرك مؤدبة .., تكون دى اخرتها
بعد كده اصحابى فهمونى انها مش حاجة أبيحة .., معلش بقى يا إنجى ظلمتك .., مهو انا مكنتش أعرف بقى
رحت عند أنجى وقريته وعرفت انه التاج ده شوية أسئلة كده .., غرضها تلبيس الزبون اللى هو انا طبعا
قلت هجاوبه بس لما ابقى رايق .., شويه كده وداخل عند الزميلة غواص بحر الأمل فى المدونة الجميلة اللى بحبها
لقيتها عاملة نفس التاج ومزودة عليه تاج كمااان ومختارة العبد لله علشان يجاوبه
أنا مبجاوبش التاج ده لأى حد على فكرة (يا شيخ اتلهى .., انت كنت لاقى ) ده اول تاج حد يعبرك بييه
انما علشان خاااطر أنووووووجتى وعلشان خاطر غوااص .., انا قررت أجاوبه
أنا دوشتكم معايا .., ايه الرغى ده كله ., هجاوب التاج على طوول اهه

اية اللي حيحصل لايميلك لما تموت ؟
يا ساتر يا رب
من أولها كده مووت
ايه اللى هيحصل يعنى .., الناس اللى بكلمهم وميعرفونيش .., هيلاقونى او لاين على طوول وهيفتكرونى بلكتهم .., شوية كده والايميل نفسه هيتقفل
انما انا شايف السؤال الأحسن .., ايه اللى هيحصل للمدونة لما اموت
الناس هتفضل تدخل وتعلق .., لحد مواحد من ولاد الحلال اللى اعرفهم يخش يقول ان انا اتكلت على الله ويقول لكل اللى يدخل يقرالى الفاتحة

اديت الباس وورد لحد قبل كده؟
لا محصلش انى اديت باسوورد ايميلى لحد .., يمكن بحب احتفظ بجزء من خصوصيتى .., فمحصلش انى اديت الباسورد بتاع ايميلى لحد قبل كده
لو اه ..كانت طبيعة علاقتك بيه ايه ؟
مقلنا محصلش.., ولو هيحصل .., هيبقى اكيد حد بحبه
اسمك ؟
هو أنا قاعد فى القسم ولا ايه .., لا انا محدش يقولى اسمك
انتو فاكرينى ملييش اهل ولا ايه
قال اسمى قال
شوية شوية وتقولولى اسم الدلع
ولا الطيب احسن
اسمى احمد فؤاد
اسم الدلع المشهور فى وسط اصحابك ؟
ادى اخرة التساهل .., وصلنا لاسم الدلع
انا قلت مسكتش من الأول
أنا محدش يقدر يدلعنى .., ولو حد دلعنى أغزه
عمرك ؟
واحد وعشريين سنة وخمس شهور
طوييل وعرييض وحليوة ولا أعوول
برجك ؟
ااااه اااحم اااحم
جينا بقى للإحراج
بصو أنا هقول
بس مش عايز حد يفتح بقه
لو سمعت حد بيضحك هعوره
العذرااااااااء
أيوة العذراااااااااء
بتضحك ليه يا بنى ياللى هناك انت .., انا قلت محدش يضحك
هو نصيبى كده بقى أعمل ايه يعنى
مجالك أو مجال دراستك ؟
طالب طب بشرى .., سنة خامسة
شخصيتك نوعها إيه ؟
أخضر وبأستك من فوق
رومانسى أجيد الطهو
أحب التنانين الزرقاء
أمال اقول ايه يعنى .., بقى بالذمة ده سؤال
انا عن نفسى من النوع الطيب العاطفى اللى بيخاف على مشاعر اللى قدامه .., واللى مبيحبش يزعل حد
المود بتاعك ؟
هادى معظم الوقت .., بهزر وبضحك على طوول
وقت فراغك بتعمل فيه إيه ؟
بقعد عالنت وأشوف المدونات اللى بحبها
يا اما اقعد مع صحابى ونصيع سوا
الأكلة المفضلة ؟
اااه
يا سلااام
هو ده الكلام
بحب اللازانيا ..,البيتزا .., النجرسكو .., المكرونة بالبشاميل .., والملوخية الخضراء
الصفات اللى أخدتها من بابا ؟
العصبية فى بعض الاحيان .., دماغى ناشفة .., احترام العيلة .., الصراحة التامة
الصفات اللى أخدتها من ماما ؟
الطيبة الشديدة اللى تصل للعبط فى بعض الاحيان .., الروقان .., حب الاصحاب واحترامهم .., الكرم الشديد
اكتر ست حاجات بكرهها ؟
الكذب
الحقد
الغيرة
الكره
الظلم
الفساد
اكتر ست حاجات بحبها ؟
الحب
الصداقة
الأمانة
تكبيير الدماغ احيانا
الصراحة
السفر
الشغل بالنسبة لك ؟
أكيد هيكون كل حاجة .., تحقيق الذات.., كيان مستقل .., كل اللى بحلم بيه
ايه الكمبيوتر والانترنت بالنسبة لك ؟
تقريبا دلوقتى بقى كل حاجة بالنسبة لى .., لازم كل يوم ادخل .., لو النت اتقطع بخرب بيت الراجل بتاع الوصلة .., كفاية انه عرفنى بالبلوجات وبالناس اللى زى العسل دى
بحبكو موووووووووووووووت
نيجى بقى لسؤال غواص التانى
خمس حاجات محدش يعرفها عنك ؟
الأول
وانا صغير مكنتش بحب اكل السيريلاك .., وكان اخويا الكبير بياكله بدالى هههههههههه
انا بفضحه كده صح ؟
وكان اسم الدلع بتاعى ميلوبا
على اسم نوع من انواع اكل الاطفال
كانو بيحبو يغيظونى
هههههههههه
الثانى
عندى درج خاص مبفتحوش لأى حد خالص .., فيه حاجات خاصة بيا .., حاجات قديمة أوى .., صدفة لقيتها وانا صغير ومحتفظ بيها لحد دلوقتى .., قلم فاضى بتاع واحدة كانت معايا فى الابتدائى وكنت بحبها ايامها .., وخدت منها القلم ده بعد ما فضى .., ومحتفظ بيه لحد دلوقتى .., كان اسمها ايمان .., وحشانى اوى على فكرة .., مشفتهاش من ابتدائى
قلم تانى كنت خدته هدية من مدرس الفرنساوى ولسه محتفظ بيه لحد دلوقتى
تذاكر قطر وتذاكر الترام بتاعة اسكندرية وتذاكر أتوبيسات من بتاعة القاهرة
وحاجات تانية كتيير
الثالث
وانا صغير كنت بخاف اطلع السلم بتاع البيت بالليل .., كنت بتخيل ان الوحش الاسطورى هييجى ورايا وانا مش شايفه .., علشان كده كنت بجرى واخاف ابص ورايا
الرابع
وانا صغير كنت شقى جدا جدا .., فى مرة وانا بجيب توت .., وقعت على راسى .., واتفتحت ساعتها .., وفضلت عند واحد صاحبى مستنى الدم يبطل .., علشان مكنتش عايز اعرفهم فى البيت انى جرالى حاجة .., وكان هيغمى عليا تقريبا لان الدم مكانش راضى يقف .., سبحان الله ربنا رأف بحالى .., وبطلت انزف والجرح لم لوحده من غير مروح لدكتور ولا حاجة .., وهما لسه لحد دلوقتى ميعرفوش الحكاية دى
انا شريير
نيا هاهاهاهاهاهاهاه
الخامس
أنا ممكن اعرف ان حد اتكلم عليا من ورا ضهرى .., ومقلووش .., وافضل اتعامل معاه عادى ولا كأنى سمعت حاجة .., واكون مستمتع بقى انى شريير وانى معرفتووش وانى قادر اتعامل معاه عادى .., لكن بعد شوية .., بنسى أصلا ان كان فيه حاجة .., واصفى تانى من جوه زى الاهبل
علشان كده عمرى معرفت اخد موقف قدام حد
يا اهبل
تحب تمرر التاج ده لميين ؟
والله انا معظم اللى اعرفهم عملو التاج ده
يبقى امرره للمتكاظيين كلهم نفر نفر
خصيصا المعلم سوول علشان عايز اعرف هيقول ايه فى الحاجات دى
أنا شريير نياهاهاهاهاه
وأى حد تانى يحب يعمل التاج .., يتفضله .., دى سلطانية اصلا مش تاج