Thursday, July 19, 2007,2:42 AM
مــيــكـــانـــــو
مساء آخر .. أجلس فى حجرتى كالعادة .. أذاكر كالعادة
حين يصبح كل شىء كالعادة ..تصبح الحياة لا تطاق ..
يعرف ما أقول كل من يضطر للمذاكرة فى هذا الوقت من العام
.
أقف فى المطبخ على غير العادة لاعداد كوبا من القهوة الأثيرة .., غالبا ما تعدها أمى .., ولكننى أشعر بحاجتى لتغيير جو المذاكرة بفعل أى شىء
.
قهوتنا بالحبهان .., أحبها كثيرا .., لكى أكون صريحا أحب رائحة القهوة أكثر من طعمها .., أضيف قليلا من القرنفل إلى القهوة .., يعطيها نكهة مميزة
.
قليلا من السكر وتصبح القهوة جاهزة للتسخين .., أضع السكر وأقلب .., أستدعى من الذاكرة موسيقى أوبرا كارمن .., أتخيل أننى المايسترو .., تهتز يدى بالملعقة على النغمات الموسيقية .., أبدأ فى الاندماج مع اللحن .., يقطع إستمتاعى صوت التلفاز المرتفع فى الصالة
متحادثان غبيان يتبادلان الاتهامات بشأن ما يجرى فى العراق ..,وكلا منهما يتهم الاخر بأنه غبى .., أتفق معهما فى هذا الأمر.. لا أريد أن يقطعا على نشوتى الان .., أقوم برفع صوت الموسيقى بداخلى لتطغى على الأصوات الخارجية
.
أضع القهوة على النار .., وأستأنف إدارة الفرقة الموسيقية .., تعجبنى قدرتى على التنسيق بين هذا الحشد من الموسيقيين .., ينبغى أن أعمل كمايسترو فى أوقات فراغى
.
للنار قدرة غريبة .., تدفعك للتحديق بها والشرود بعيدا .., أركز فى اللهب الأزرق وأترك إدارة الأوبرا بعضا من الوقت .., يزدحم رأسى بخليط من الافكار العجيبة .., أحاول الإمساك بفكرة واحدة ولكننى لا أستطيع .., تيار جارف من الأفكار يجتاحنى وكلما حاولت التركيز فى شىء يتملص منى إلى شىء اخر .., رابط واحد كان يجمع أفكارى .., الحنين .., الحنين إلى شىء ما لا أدرى ما هو .., وصورة واحدة تلح على
.
لا أدرى لما تذكرت هذه الصورة الان .., صورة قديمة لطفل صغير .., عارى إلا من شورت أحمر صغير.., يقف على الشاطىء بإحدى المدن الساحلية لا أذكر ما هى .., ينظر إلى الكاميرا نظرة غريبة .., لم أستطع تفسيرها حتى الان
كلما دققت فيها النظر.. هذا الطفل هو انا
.
يقطع أفكارى صوت غليان القهوة وانسكابها .., أنظر إلى القهوة المسكوبة بابتسامة..لهذا السبب لا أقف فى المطبخ الا نادرا .., أفكر فى إعداد كوب اخر بدلا من المسكوب .., ولكن لا أفعل فأنا لم اكن أريد أن أشرب شيئا على أى حال
.
أذهب إلى حجرتى وفكرة واحدة تلح على .., أفتح الدولاب وأبحث عنه .., لا ليس الشورت الأحمر بالتأكيد .., فبالتأكيد شورتى الأحمر العزيز قد اختفى كما تفعل جميع الملابس القديمة .., لا أعرف أين تذهب .., بالتأكيد تذهب فى الحملات التى تشنها أمى كل عام على الدولاب بحجة ترتيبه .., ولكن بالتأكيد هدفها الأساسى هو القضاء على ملابسى القديمة وارسالها إلى الجحيم السرى الذى لا أعرف مكانه حتى الآن .., أكتشف الأمر أحيانا حين أنظر لواحد من أبناء الجيران وأراه يرتدى شيئا من ملابسى القديمة .., أهم بالانقضاض عليه .., ولكننى أتراجع فى اللحظة الأخيرة .., وأنسحب مقهورا.., فهو لم يسرقه بالتأكيد .., الخيانة تأتى دائما من الداخل .., من قلب المنزل
.
لا لم أكن أبحث عن الشورت الأحمر .., بل كنت أبحث عن صندوق الميكانو كما كنت أحب أن أسميه .., أو صندوق المكعبات كما يطلقون عليه .., تلك المكعبات التى يتم تركيبها سويا لصناعة أشكال كثيرة .., لعبتى المفضلة وانا صغير فى الوقت الذى لا أكون فيه فى الشارع
.
أجده بعد بحث شاق .. ذلك الصندوق الأصفر العزيز .., أحتضنه كما تحتضن الأم وليدها ..,أمسح عنه بقايا الأتربة .., أفرغ الصندوق على السرير..وأنظر إلى قطع المكعبات بسعادة جمة وابدا فى اللعب والتركيب ..و ..التذكر
.
نشوة الذكريات هيا ما كنت أريده .., أستمتع بما أفعله ..وأدندن .. فولا فولا ..بالوم بيلا .. قد تدخل أمى وترى هذا المشهد لتتأكد أن ابنها قد جن تماما .. , لا ألومها كثيرا فأنا نفسى بدأت أعتقد هذا الاعتقاد .., ولكننى لا أبالى .., أكمل اللعب .., والغناء .., طيرى طيييييييييييييرى ..ياااا عصفوووووووورة
.
مساء اخر هو .., ولكنه مختلف عن أى مساء .., مساء مغلف برائحة القهوة والذكريات .., و ..الميكانو


 
Sunday, July 15, 2007,1:07 AM
painful sorrow

بيتهيألى أصعب حاجة فى الدنيا
.
لما يكون حد غالى عندك أوى زعلان .., وانت للأسف مش قادر تعمله حاجة
.
علشان مفيش بإيدك حاجة تقدر تعملها
..
!!أصعب حاجة ..مش كده ؟
 
Sunday, July 8, 2007,1:03 AM
وكمان تلت تاجات
ندخل على طول فى التاجات من غير كلام كتير


التاج الأول ده بيسأل هل أنت مدمن هيروين ؟؟ .. لا لا مش ده .. التاج بيقول هل أنت مدمن تدوين ؟؟ والنتيجة السودة المهببة انى طلعت مدمن عالتدوين بنسبة 84 فى المية .., يعنى من الاخر شمااااااااااااااام


والتاج ده جالى من الصديقة العزيزة علا صاحبة مدونة من غزة


شكرا يا علا عالفضيحة






84%How Addicted to Blogging Are You?


.

التاج التانى وده من زمان اوى جالى من إسراء وأحمد مبرمج حر و شيرمن

والتاج بيقول

أحب شخص لقلبك فى الدنيا ؟

سيدنا محمد عليه الصلاة والسلام

انسان مستعد تضحي بحياتك – ركز فى كلمة حياتك - عشانه؟

أمى وأبويا وسيدنا محمد عليه الصلاة والسلام برضه

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك ؟

شارون أيام أحداث الانتفاضة .., وكل جندى أمريكى أو إسرائيلى .., وكل حد بيهزأ من القرآن أو من السنة

ما هو

اسم أجمل كتاب كتبه بشر قرأته ومحتفظ به حتى الان؟انت متعلق بيه وبتقرأه كل فترة؟

الخيميائى لباولو كويلهو

اهم جهاز منزلى انت متعلق بيه او بتستخدمه كتير؟

الكمبيوتر

شىء تحس بالراحة النفسية عندما تنظر اليه؟

البحر لحظة الغروب بيبقى مريح للعين وللقلب اوى

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

بيتنا القديم

اجمل مدينة زرتها داخل مصر؟

إسكندرية

أجمل مكان طبيعي رأيته داخل مصر؟

جبل الطور بسيناء

شخصية كارتونية بتحبها؟

الدوك فليد قائد جريندايزر واللى كان إسمه عالأرض دايسكى


نوع هاتفك المحمول؟

سا مسونج z- 140

سرعة بروسيسور جهازك؟

1.7 gh

حجم ذاكرة –هارد- جهازك؟

80 gega byte

المساحة التى تشغلها المواد الاسلامية على جهازك؟

8 gega byte

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

أتمنى انها تزيد عن كده

أهم هدف انت واضعه لحياتك دلوئتى؟

شغلى ..,إنى أسافر وأعمل الزمالة وأكمل ماجيستير ودكتوراة من برة

مواصفات فتاة الأحلام بالنسبة لك ؟

انها تكون بتحبنى زى ما انا بحبها .., تكون متفهمة لطبيعة شغلى .., تكون متدينة .., تفهمنى أوى وتفهم الوقت اللى بكون متضايق فيه وتحس بيا .., تحترم أهلى أوى لأنهم أغلى حاجة عندى .., تكون خفيفة الدم .., تكون طيبة زيى

صف ما يأتى

شعورك لما بتسمع كلمة مصر ؟

زمان كنت بحس بهزة جوايا وشعور حقيقى بالانتماء .., دلوقتى الانتماء لسه موجود بس الهزة دى راحت ..,لما أشوف فيديو زى بتاع تعذيب الأسرى وأشوف رد وزارة الخارجية على إسرائيل وأشوف ان دمنا ميسواش تعريفة عند حكومتنا ساعتها بحس انى عايز أرجع

شعورك لما بتسمع كلام عن اليهود؟

مشاعر كتير الحقيقة .., القرف والغثيان منهم .., الحزن عاللى احنا فيه .., والغضب الشديد من اللى بيعملوه فينا

شعورك لما بتشوف ظابط شرطة؟

بغض النظر عن ان أكيد فيه منهم ناس كويسين وولاد ناس .., إلا انى بحس بنوع من العداء الشديد ناحيته يمكن لانه أول حارس من حراس السلطة الفاسدة فى بلدنا وأكبر مثال على فسادها

لون البطانية اللى بتتغطى بيها فى الشتاء؟

لونها حلو .., هما اتنين واحدة زرقا وواحدة صفرا

لون الجورب-الشراب- المفضل لديك؟

الألوان الغامقة عموما

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

ايه التاج المقرف ده .., احساس مقرف أكيد .., بحس انى عايز أرمى نفسى فى اقرب سلة زبالة

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

بدعيله انه يبقى من جوه أفضل من برة وان اللى عامله ده ميكونش رياء

احساس يراودك فى اشارة مرور مغلقة بسبب مسئول كبير؟

احساس بان البلد دى بقى فيها مفتريين كتيير وان شاء الله ربنا هيوريهم كلهم وهتبقى أخرتهم سوده ومطينة

وادى التاج التانى خلص .., يتبقى التاج التالت

واللى جانى من الصديقة العزيزة مرام صاحبة مدونة ما عليناااا

مين اكتر ست اشخاص بتحبهم ؟؟؟

أبويا وأمى وأخواتى كده خمسة .., وخالى كده يبقو ستة

هل أنت سعيد ؟

الحمد لله

لو اجتمعت مع حسنى مبارك فى مكان واحد هتعمل ايه ؟

هقوله انت هتتسأل على كل واحد فينا .., فيه ناس فى بلدك مش لاقية تاكل وبتموت من الجوع.., ضامن تدخل الجنة بقى ؟

لو معايا مليون ونص أعمل ايه ؟

اشمعنى نص يعنى .., انا مبحبش الكسور دى يا مليون يا اتنين .., المهم .., هدى نص الفلوس دى لأبويا علشان يظبط نفسه بيهم ويحج هو والوالدة.., واظبط نفسى انا بالباقى .., مش هيفضل كتير .., يدوب بس أشتريلى حاجة ساقعة

بتحب مصر ؟

ودى محتاجة سؤال .., أكيد طبعا

أنت مسلم ؟

الحمد لله

ليه ؟

إن الدين عند الله الاسلام واكيد كل واحد فينا بيتولد بيبقى على والده علشان كده لازم كلنا نقرى فى الديانات التلاتة ولازم نقتنع بالدين اللى احنا عليه علشان كل واحد هيتحاسب لوحده .., وانا والحمد لله من قرائتى ارتحت جدا جدا للاسلام وعرفت انه الدين الحق وهو الدين اللى أتى مكمل لجميع الأديان السابقة والدين اللى مسابش حاجة من أمور الدنيات ولا الاخرة الا وذكرها والدين اللى فيه القرآن المعجزة اللى تعهد ربنا بحفظه

مين أكتر شخصية متقدرش تستغنى عنها ؟

أمى

ايه أكتر موقف محرج ؟

لما بفضل أكتب فى تاج طويل كده

الأمنية اللى اتمنى تحقيقها ؟

انى أخش الجنة

التاج بقى يتمرر لمين ؟

أخيراااااااااااااااااااااا

التاجات دى همررها لمين

بصو انا عارف ان فيه ناس عملت تاجات فيهم فانا هقول الاسماء واللى عمل تاج يعمل الباقى واللى عملهم كلهم يبقى نفد بجلده

إسراء الأميرة المفقودة , مرام معملتش تاج الادمان ده .., سها معملتش تاجين فيهم .., أنا كده صاحبة مدونة مش قادرة .., خمسة فضفضة .., زحل الفلكى وجوسى ..,يا مراكبى اعمل التاج اللى يعجبك ..,رودى وساعة الغروب ..,نوران وشمعتها ..,ياسمين الانسانة اعملى تاج الادمان .., بيسو وحكاوى وتخاريف ..,كاميرا جيرل ..,محمد عبد الغفار.., وينكى من غير فذلكة .., وشوشنى .., عقد الياسمين ..,ساعة سكينة..,د/ تخاريف ..,بيج بيج جيرل ..اللى هيا مى ..,تسنيم مبتجاوبش تاجات بقالها فترة ., اعملى تاج الادمان ده سهل ..,أودى عادى بقى رفيق الكفاح فى رحلة الساقية ..,جومانة لما تعمل مدونة., وأى حد تانى عايز يجاوب

 
Monday, July 2, 2007,11:55 PM
الأهلى عمهم







الله أكبر


عملوها الوحوووووووش


يا ريتنى كنت معاهم


(:


.


وهكذا يكمل الأهلى مشوار البطولات..,ولا عزاء للزملكاوية ... بين قوسين إيموشن مطلع لسانه


.


*****************





دى كانت أخبار الأهلى


أما أخبارى بقى .., فالحمد لله حليت فى الامتحانين كويس أوى


متشكر جدا ليكم بجد على دعواتكم وسؤالكم اللى فرقو معايا أوى


وشكر خاص للأميرة إسراء على فكرة البانر الجميلة هيا واخواتها واخواتى الأعزاء جدا تسنيم ومنة

وشكر كمان لأحمد مبرمج حر اللى صمم البانر ده .., وللدكتورة مرام ما عليناااا ..اللى عملت بوست للدعاء لأخواتها المزنوقين من أمثالى
الإمتحانات الفعلية بتاعة اخر السنة هتبدأ فى أول تسعة ان شاء الله وهتخلص فى نص عشرة .., علشان كده يا ريت الدعاء ميقفش .., أنا عارف انكو زهقتو بس معلش .., استحملو بقى .., كان مين اللى قالكو تدخلو طب وتفضلو تمتحنو على طول كده .., حاجة غريبة فعلا .., أنا زهقت منكم ومن كتر امتحاناتكم .., حاجة غريبة صحيح يعنى
مش هغيب عنكم ان شاء الله .., عليا تاجين فى ذمتى لازم اعملهم قبل ما يجرالى حاجة
محدش ضامن اليومين دول .., علشان كده البوست الجاى ان شاء الله اعمل التاجات اللى باظت من الشمس فوق السطوح دى
coming soon the delayed tags