Wednesday, May 30, 2007,1:46 AM
Only in Egypt

أصـلك طـيـب
شريط جديد حاليا بالأسواق
للمطرب العالمى
عزت الأمير
AZET EL AMIR
.
لا تتردد فى حجز نسختك الآن فالكمية محدودة جدااااا
.
D:
___________________________
.
على فكرة الصورة دى حقيقية شفتها من كام يوم مالية الشوارع عندنا هنا فى الزقازيق قلت لاااازم اصورها وأنزلها عالبلوج .., اهو انا دلوقتى عرفت الناس المجهولة اللى بيغنو فى الميكروباصات بيبقى شكلهم ايه
أكيد كلمة بيغنو دى متنطبقش عاللى بيعملوه .., ممكن نسميه أى حاجة غير بيغنو
اللى يقول أديك تقول مخدتش يا ناكر الجمييل أموت واعرف اداه ايه وقاله انه مخدوش
واللى يقول الدنيا خرباااانة ..,ويعدد محافظات مصر واحدة واحدة ويؤكد بما لا يدع مجالا للشك اسباب خرابها خربت عيشته البعيييد .., ده غير موسيقى المولد والتنويعات والديجيهات اللى اتعملتلها حسستنى انها المقطوعة الأم لكل الموسيقات اللى فى الدنيا وان العبقرى اللى اكتشفها بينافس يانى وجان ميشيل جار وعمر خيرت فى قائمة الأفضل سماعا
.
أكيد حد ظريف هيقولى ان موطنهم الأصلى الزقازيق وانهم بعد كده انتشرو فى انحاء مصر
بس انا ومن موقعى هذا بأكد ان دى إشاعات .., الراجل ده دخيل .., وانا سمعت من مصادر موثوق فيها انه ماضى عقد احتراف لمدة سنتين بس هنا فى الزقازيق وبعدهم هيرجع موطنه الأصلى تانى اللى هوا السجن
فيه بعض الشائعات المغرضة اللى بتقول انه أمير عربى من دولة شقيقة استنادا لكلمة الأمير فى الصورة.., بس بعد عرض الصورة على جميع السفارات العربية .., أعلنو استنكارهم وشجبهم للموقف وأكدو على خلو أراضيهم من أى عزت يحتمل ان يكون له علاقة بالصورة
بس أنا عندى شكوك عميقة ان الراجل ده ليه علاقة بتنظيم القاعدة وانه أمير جماعة هناك وباعتينه جاسوس هنا
ايه رأيكم يا جماعة ؟؟
الراجل ده تبع مين بالظبط ؟؟
 
Saturday, May 19, 2007,12:13 AM
لــعنة أن تكون طالب طب
.
.
لن أحدثكم اليوم عما يحدث داخل أروقة كليتنا العتيقة
يحتاج الأمر إلى مجلدات للحديث عما يحدث هناك .., بمعنى أصح عما يفعلوه بنا هناك .., يمكنك أيضا بناء الجملة للمجهول لتصبح عما يُفــعل بنا هناك .., تنويعات كثيرة يمكنك إستخدامها لتصل إلى المعنى النهائى
بالتأكيد تعلمون جميعا ما هذا الذى يحدث .., لذا لن أحدثكم اليوم عما يحدث هناك
أحد القراء : ما الذى يقوله هذا الأحمق ؟ لم افهم شيئا
قارىء اخر : أنا أيضا لم أفهم شيئا .., ثم لماذا نتحدث الفصحى ؟
قارىء غاضب : تبا له .., انه ذلك الكاتب .., يجعلنا نتحدث الفصحى لأننا فى مدونته .., يذكرنى كلامنا بالروايات المترجمة ترجمة ركيكة .., حين يقول السير طوماس ..هلمو نشرب الشاى فوق المدفأة .. يبدو أنها ليلة جميلة ..لترد مارثا بانبهار ..واو ..ياله من ذوق رفيع يا سيدى
أنا : ما هذا ؟ .., من هؤلاء ؟؟.., إذا لم يعجبكم ما أقول فلتذهبو إلى الجحيم .., إنها مدونتى حيث أتكلم كما أشاء .., وأجعلكم أيضا تتحدثون بالفصحى .., دعونى أكمل ما بدأت ما زال الحديث فى أوله
أحد القراء بتوسل : تحدث أنت كما تشاء ولكن اتركنا نتحدث العامية .., لن نحتمل أكثر من هذا .., أرجوووووك
أنا بامتعاض : حسنا .., دعونى اكمل كلامى ولنرى
.
.
نعود إلى الحديث مرة أخرى .., سأكلمكم اليوم عما يحدث لى خارج الكلية .., هذا الأمر يضايقنى هذه الأيام
أشعر أننى قد أصبحت مريضا بالضغط مما يحدث لى .., ربما هو نوع من اللعنة .., أن تكون طالب طب .., كيف يعاملك الناس .., كيف يتحدثون معك .., كيف يستبيحون وقتك
.
يبدأ الأمر حينما أقابل احدهم .., ينظر إلى السماعة فى يدى نظرة خبيثة .., ثم يبدأ فى فتح الحوار دون استئذان
يبدأ بالسؤال الأول : أنت دكتور ؟
أرد بتحفز : أيوة ..لسه طالب
تبدو نظرة انتصار فى عينه ..,يحدث نفسه.. انه يحمل سماعة .. إذن فهو طبيب .., يا للعبقرية
يكمل بسماجة : وفى سنة كام يا دكتر ؟ - يقولها هكذا حتى يشعرنى بثقافته
أرد بملل من اعتاد على الموقف : سنة خامسة
ليأتى السؤال الذى صرت أمقته : ويا ترى اتخصصت ولا لسه ؟
لأبدأ حديثا مطولا عن أن التخصص يكون حينما أكمل الدراسة تماما .., وعندها أختار المجال الذى سأتخصص فيه وأكمل فيه الدراسات العليا من ماجيستير وخلافه
ينظر لى دون اقتناع وهو يتعجب من الأطباء الذين يتأخرون فى التخصص ولا ينسى أن يخبرنى أن حمادة ابن اخته قد تخصص وهو فى السنة الاولى .., ويدعو لى بالهداية .., ثم يخبرنى أن اسرع بالتخصص حتى لا أصير من الاطباء الفاشلين
أنهى الحوار سريعا كى لا أقتله .., من سمح له بالتدخل فى حياتى بهذا الشكل
أجلس فى البيت لأجد جارة من الجارات تأتى ..تبدأ فى متتابعة الأسئلة التى أمقتها
وتسأل السؤال العقيم : أنت اتخصصت ولا لسه ؟
لأبدأ فى الرد المحفوظ
تمصمص شفتيها شفقة على هذا الفاشل ..ثم تقول : خلاص ابقى اتخصص نسا بقى .., علشان تنفعنا .., ولا أقولك ..ممكن تبقى أطفال ..علشان الواد حمادة مغلبنى .., حاجة من الاتنين .., انا بقولك اهه
أمنع نفسى أيضا من قتلها وابتسم ابتسامة دبلوماسية لأخبرها أن احلام سيادتها أوامر
تمصمص شفتيها مرة أخرى فى امتعاض وتتحسر على الزمن الأغبر الذى جعل الفاشلين من أمثالى يدخلون الكلية ولا يتخصصون من السنة الأولى
.
.
وتتوالى الاستشارات الغريبة الغير مفهومة اطلاقا .., يعتقد الجميع اننى اذا نظرت الى أحدهم بعينى المجردة لابد وان اكتشف اذا كان يعانى من سرطان القولون أو متلازمة فانكونى أو تضخم البروستاتا
واخر الاستشارات الغريبة حين أوقفنى عم نبيه ..صاحب محل للدهانات .., أوقفنى فى الطريق
بدأ بالطبع فى متلازمة الاسئلة الكريهة ..ثم مال على بشكل مريب وهمس فى أذنى قائلا : تفهم فى اختبارات الحمل يا دكتور ؟
أخبرته بأنها شىء بسيط تفهمه اى سيدة
رد على وتقاطيعه تحمل قسوة غريبة : خد شوف كده وقولى حامل ولا لأ
بدأت أشك فى نوايا عم نبيه .., وبدأت ارتاب فى صاحبة هذا الاختبار ..فسألته : أنتو عاملينه ليه يا عم نبيه ؟
رد على بقسوة : لو طلعت حامل ..يبقى مش هعرف أدبحها.., علشان كده عايز أعرف .., طمنى يا دكتور
أنا بهستيرية : تدبحها ليه يا عم ..حرام عليك .. هيا عملتك ايه ؟
رد عليا : أيوة يا دكتور ..لازم أدبحها .. أمال انا جايبها ليه ..وبعدين العيد كمان يومين
أنا بعدم فهم : عيد ايه .., مش فاهم ؟
هو : أيوة ..العيد يا دكتور .., أمال أنا اشتريت المعزة دى ليه .., عايز أضحى بيها فى العيد .., لو طلعت حامل مش هعرف أدبحها
لكم أن تتخيلو موقفى وقتها .., هذا الأحمق الذى يحضر اختبار حمل للمعزة .., لا يهمنى هذا .., ولكن لم يقع اختياره على .., هل وصل حظى التعس لهذه الدرجة .., ام هى اللعنة .., لعنة طلبة طب
.
أحد القراء : خلاص يا بنى أنت صعبت علينا ..متعملش كده فى نفسك ., ايه ده احنا بنتكلم بالعامية .., أشطة يا معلم .., تيك كييير بقى .., وخلى الحياة اخر زنجفة
القارىء الغاضب : واحنا مالنا يا عم بأم المشاكل دى .., وبعدين ما الناس ياما بتشوف .., لازم تصدعنا يعنى بكلامك ده
أنا : وحياة أمك لو سمعت صوتك فى المدونة تانى لأعملك شيفت ديليت وأعورك
.
.
فلأكمل المأساة .., تستمر المعاناة حين ينتقل هذا الضغط الى بيتى
حين يسألك الجميع عن موعد تخصصك او تخرجك .., يمكنك أن تعذرهم .., ولكن حين تأتى والدتك لتسألك هذا السؤال بمعدل مرة كل أسبوعين من السنة الاولى وحتى السنة الخامسة.., فلا مفر من الانتحار
وتبدأ الأسئلة الغريبة على غرار : هو الخيار بيتخن ؟ .., هيا البامية فيها مضاد حيوى ؟
يمكننى ان أتحمل هذا .., ولكن يأتى الهجوم الأقوى من التلفزيون
أطباء التغذية العلاجية بالخضروات و العلاج البديل بالكمون وهذا الهراء
انتشرو بشكل بشع .., وبالطبع أثرو على الجميع ..خاصة السيدات ومنهم والدتى
تتصل احداهم بالدكتور البديل لتخبره بانها قد تخلصت من الرحم ولا يمكنها الإنجاب اطلاقا وتعدد الكثير من الامراض الأخرى
ليقاطعها الدكتور البديل كالملسوع ويصيح بأعلى صوته : البــردقووووووووووووووووووش .., مفيش غير البردقوش .., هوا اللى هيحللك كل مشاكلك
وعندما يطلبون منه أحد النصائح لسيدات البيوت يتجلى قائلا : الشطة .. الشطة من أحسن الحاجات اللى تفتح الشرايين
وينسى الجميع أثر الشطة على البواسير
وأجد بقدرة قادر أن الأكل اليومى أصبح مزيجا من الشطة والبردقوش .., وحين أبدأ فى الشكوى و أخبر أمى بأن هذا عذاب وأن هذا الرجل لا يفقه شيئا .., وأن معظمهم نصابين لا يفقهون شيئا فى الطب
تمتعض وتسألنى بنظرة قرف : أنت اتخصصت ولا لسه ؟
 
Wednesday, May 9, 2007,5:24 PM
هذيــان

.
.
طـفل كبير أنت .. تهوى السخرية
تسخر من الجميع من حولك .., ولا تنسى بالطبع أن تسخر من نفسك قبل الجمــيـع
.
تجيد الهرب دوما .. فأنت أكثر من يعلم مدى هشاشتك
لا .. لا تتخذ سياسة دفن الرأس فى الرمال فى مواجهة المشاكل .. أنت أذكى من ذلك
.
فقط أنت تتوقف عن التفكير
التفكير فى بديهيات تسلم بها قبل الجميع ... تكرهـها ... لكن تسلم بها
بديهيات كثيرة مؤلمة .. يطالبك الجميع بالتفكير وايجاد حلول ليست بيدك بالتأكيد
.
هم لا يعلمون كم أنت هش
أو ربما يعلمون ..لكنهم يستمتعون بإدمائك
ربما تكون أنت وسيتهم التى تشعرهم بأنهم أفضل حالا
.
تعلم ذلك ولكنك تواصل الهرب ., والبحث عن ذات تأبى ملاقاتك
ربما تظن أنك لا تستحق
.
تخشى الانكسار ..تتظاهر دوما بالقوة والامبالاة ., وبعض الهدوء الذى لا ينم عن شىء
.
كـم تخشى تلك اللحظة ..حين تصبح وحيدا
تعلم أنها آتية لا محالة .. تتجنب التفكير
ومرة أخرى تكمل هروبك
.
***********
.
طفل صغير أنت الآن
لا تدرك ما ينتظرك
تشارك الصغار ألعابهم .. لكن بقواعدك
.
لحظات استمتاعك قليلة .. فالحياة أمامك علامة استفهام كبيرة تحاول فك غموضها
لحظات انفرادك بنفسك كثيرة .. لحظات غير مفهومة من الاستمتاع بالوحدة فى بعض الأحيان
والألم ومعاقبة الذات فى أحيان أخرى
.
لغز كبير أنت
لا يفهمك أحد
تخشى الإعتراف بأنك أحيانا لا تفهم ما يجرى بداخلك
أنت أيضا تحتار مثلهم .. , ولك كل الحق
.
تختنق أنت الآن
لا تعلم ماذا تفعل
تخط بعد الكلمات الحمقاء
تهذى هو التعريف الأصح لما تفعله الآن
ألا تشاركنى الرأى؟؟
.
أنت تهذى بالفعل
.
**********
أتعلم يا صديقى
إن العالم ملىء بالحمقى
لكننى وبصدق
لم أر من هو أكثر منك حماقة
.
.
تمت
____________________
معذرة لعدم الرد على التعليقات لضيق الوقت الشديد
أرجو منكم الدعاء لأخيكم
 
Friday, May 4, 2007,1:23 AM
تلت تاجات ...وأستك

التاجات كترت عليا أوى .., وانا يا جماعة كبرت وبقيت عضمة ناشفة

المرة دى هجاوب 3 تاجات .., تاج أحمد مبرمج حر اللى بصراحة يعنى حمض عندى .., أنا مكسوف منك يا أحمد ووشى فى الارض والله .., حكاية تأخير التاجات دى بتبقى غصب عنى والله .., انا عارف انك باعت التاج من زمان اوى .., معلش بقى .., انا هجاوب اهو :)

التاجين التانيين من سها ودول كمان من زمان ., انا عارف انك هتعذرينى

هنقضيها اعتذارات بقى ولا اييه .., مخلاص .., محدش يفتح بقه بقى ويقولى اتأخرت ليه ..,انا اعتذرت كتير اهو

نجااااااااااااااااااوب بقى

.

.

الأول .. تاج الشخصية العجيبة ..من سها


?What Famous Leader Are You

personality tests by similarminds.com

.

التانى ..تاج الممارسة والاستغراق ..بتاع أحمد

.

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها

.

يااااه يا أبو حمييد .., فكرتنى بزمان .., طبعا القراية .., القراية بالنسبة لى مش مجرد هواية ., دى تقريبا هوس .., حب القراية والانفصال التام عن العالم لما يكون فى ايدى كتاب .., بدأت أقرى تقريبا من أولى ابتدائى

كانت البداية مع مجلات بطوط وميكى والعم دهب .., كنت بعشق العالم بتاعهم .., كنت الطفل الصغير الغريب اللى تلاقيه فى الفسحة بدل ميلعب ..قاعد فى الفصل وفى ايدى مجلة ومع نفسى خااالص

بعد كده قريت تان تان .., الولد اللذيذ أبو قصة شكلها غريب لسه فاكر شكله لحد دلوقتى .., مغامراته كانت تحفة .., وطبعا كانت مجلات مصورة لانى كنت لسه صغير

بعد كده حوالى فى تالتة ابتدائى بدأت اقرى سماش وفلاش .,الله يمسيك بالخير يا مواطن يا مطحون

وبعدين انتقلنا الى عالم نبيل فاروق وأحمد خالد توفيق

عالم كامل من المتعة مع رجل المستحيل وملف المستقبل وكوكتيل 2000 وفارس الأندلس وماوراء الطبيعة وفانتازيا وسافارى .., وبعدين الروايات العالمية للجيب .., الوقت ده أثر فيا اوى ., ويمكن جزء كبير من ثقافتى خدته من الاتنين دول .., وانا لسه مبطلتش قراية ليهم على فكرة

بعد كده بقى مبقتش اسيب حاجة الا واقراها .., الروايات العالمية .., والعربية .., مسبتش كتاب فى مكتبة اى مدرسة دخلتها الا وقريته .., حالة غريبة من العشق بحس بيها لما أشترى كتاب جديد .., اكون هموت واروح علشان أقراه

لو تشوفنى وانا داخل الاوضة ومعايا كتب اشتريتها ., تحس انى رايح اقابل حد بحبه .., أفرز الكتب فرز محترف .., وارتب القراية حسب المود المتوقع .., وامسك الكتاب اللى هقراه وانفصل عن الدنيا بحالها

لو سألتنى ايه ألذ لحظة فى حياتك .., اقولك فى يوم برد فى الشتا .. الجو بيمطر برة .. أنا قاعد فى أوضتى ومعايا مج النسكافيه .. وكتااب .., الجو يبرد زيادة .., أنزل تحت البطانية الحبيبة .., ومعايا الكتاب .., واقرى

شعور ممتع .. الجمع بين القراية والدفااا

الحاجة التانية اللى كانت بتفصلنى عن العالم تماما .., هيا مش هواية .., بس عشق طفولى للكارتون

أنا بعشق الكارتون .., مفيش كارتون اتعمل فى الدنيا الا وشفته .., وكنت بنفصل عن العالم بجد .., لدرجة انى مرة فى أولى اعداى تقريبا .., فتحت كارتون نت وورك ..وفضلت اتفرج على الكارتون ..., ونسيت انى عندى امتحان اخر السنة .., الامتحان كان الساعة 10 وانا فضلت اتفرج للساعة 11 ومش فى دماغى اصلا ., لحد ما واحد صاحبى الله يكرمه استأذن الاساتذة انه ييجى يندهلى .., ولان الاساتذة عارفينى لانى كنت شاطر فسمحوله انه ييجى ويندهلى.., والحمد لله لحقت الامتحان .., اللذيذ انه كان امتحان جغرافيا .., شفتو التاريخ الاسود

لما صاحبى بقى عرف انى كنت بتفرج على كارتون حاول يقتلنى .., والاساتذة خلصونى من ايده :)

.

.

الثالث .. تاج الاسئلة الغريبة .. من سها

.

.

section 1


?last beverage

كوباية شاى معتبرة

?last phone call

النهاردة الصبح مع شفيع ..بيسألنى عن ميعاد الامتحان بتاع النهاردة

?afriend last instant message

كانت من أشرف صاحبى ..بيقولى أولا .. محدش يقدر يلمس سنانه كلها بلسانه

ثانيا ..لو قدرت تلمس سنانك كلها بلسانك هتخش الجنة

ثالثا.. أكيد كل الناس الحمقى هيحاولو يلمسو سنانهم دلوقتى

رابعا ..المعلومة الاولى غلط مش صح

خامسا .. المعلومة التانية كمان غلط مش صح

سادسا ..الرسالة دى مبعوتة للحمقى أصلا فسيبك منها يا احمد ومتقراهاش

:)

?last cd played

sway with me.., i love this song

?last time you cried

مش فاكر لانه كان من زمان اوى ..انا مش من عادتى انى بعيط كتير ..لما اعيط يبقى اكيد فى مصيبة

?last text msg

حازم كان باعتلى رسالة فيها أدعية كتير كده لانى كنت تعبان شوية

أصيل يا حازم

....

section 2

have you ever

?dated some one twice

يااه ..كااان زمااااااااااااااان

ههههههه

?been cheated on

محصلش

?kissed some one and regretted it

أستغفر الله العظيم ..يا جزووفى يا جزووفى

ايه الاسئلة اللى تودى فى داهية دى .. لا يا عم مش لاعب

?lost some one special

was about to lose but thnx god

?been depressed

هع هع هع .., نكتة ظريفة .., المفروض السؤال يبقى انت امتى مبتكونش مكتئب .., او ايه هيا اللحظة الاسطورية الى بتحس فيها ان الحياة حلوة

الاكتئاب دلوقتى بقى اسلوب حياة واحنا بنعمل جمعية دلوقتى وهنسميها جمعية الحفاظ على المكتئبين من عوامل السعادة الخارجية

?been drunk and threw up

يووه .., كتيير أوى .., ده انا هق .. بشرب هق هق ..كتير أوى ..هق .. وبتطوح كمان ..هق

هات القزازة واقعد لاعبنى ..هق ..دى المزة طازة ..والحال عاجبنى ..هق

ايه الاسئلة دى يا اخوانا

انا البنى ادم الوحيد اللى اثبت انه بيتسطل من القهوة .., اشرب القهوة من هنا .., واناااااااااام

......

section 3

list 3 favourite colours

الأسود والكحلى والأكاجون

حد هيسألنى ايه الاكاجون ده هقول معرفش ..بس بحبه برضه

...........

section 4

this month have you

?made anew friend

الحمد لله آى ثينك سو

?fallen out of love

يا رب يا اخويا يا رب

? laughed until you cried

اه ..احنا عيال مسخرة أصلا ..مشينا وقعدتنا عبارة عن ضحكة طويلة بنقف فى النص علشان ناخد نفسنا بس وبعدين نكملها

?met some one who changed your life

لأه

? Found out who your true friends were

ما هم معايا لازقين اهو

?Is there something you want to tell someone

كتير

? Would you kiss anyone on your top friends

لما هحب هبوس

? How many people on your top friends do you know in real life

كلهم والحمد لله


? How many kids do you want to have

تلاتة

? Do you wanna change your name

لا طبعا ..انا بحب اسمى جدا

What did you do for last birthday

انا معملتش صراحة ..صحابى ربنا يخليهم عملولى عيد ميلاد تحفة لما كنا فى اسكندرية ..وألذ حاجة فيه انه كان مفاجأة

انا كنت معاهم طول اليوم عملوه ازاى ولاد اللذين دول


? What time did you wake up today

الساعة 9.30

.What were you doing at midnight last night

كنت بتفرج عالتلفزيون

? Name something you CANNOT wait for

انى اخلص الكلية دى بقى

Last time you saw your father

من خمس دقايق .., بقاله ساعة يقولى تعالى اتعشى .., اقوله حاضر ..يروح وييجى تانى ..تعالى اتعشى ..اقوله حاضر لما اكتب البوست ده ..يروح ويقولى انت متعشتش ليه

اقوله حااااضر ..لحد مجابلى كيس دوريتوس وراح ينام


.What is one thing you wish you couldchange about your life

كتيييير

?What are you listening to right now

امال اللى فوق كانت ايه

sway with me برضه

?Have you ever talked to Tom

اه ..ده توم حبيبى ..كنا قاعدين مع بعض من شوية .., يا بشر توم ده اللى مألف التاج .., والمفروض كل واحد ذكى جاله التاج كان يشيل توم ويحط اسمه هوا .., فهمتو بقى
?
Have you ever talked aboutsomeone behind their back

اه بتحصل صراحة ..يا جزوووفى يا جزووفى

?What’s the last piece of clothing youborrowed from anyone

اه ..من زمان ..كنت عند أسامة بنذاكر ..وبعدين اتخنقت من هدومى .فأسامة جابلى جلابية طويييلة عرييضة ..غصت فيها .. متشكر يا أس اس

?Who’s getting on your nerves right now

التاج ده

? Most visited webpage

Google


coke or pepsi

بيبسى طبعا


? Mac or PC

pc

هفففففففففففف

اخيرا خلص

والله منا ممره لحد

انا اتشلييت

يللا بقى سلام عايز اكل الدوريتوس