Thursday, January 4, 2007,11:11 PM
ابتديــنــا
ترددت كثيرا قبل أن أبدأ بعمل بلوجى الخاص .., ربما كان خوفا من كتابة ما أشعر به .., وعرضه على الجميع (أصل فيه بلاوى كتير جوه ) وربما لأسباب أخرى لا يعلمها الا الله..ولكنى فى النهاية قررت عمل بلوجى الخاص .., قد يتبادر الى ذهن البعض اننى مدون جديد طازة ( لسة وظووظ يعنى...ووظووظ لمن لا يعلم معنى هذه الكلمة فهى مفرد وظاويظ ) ولكن الحقيقة ان رحلة التدوين بدأت معى منذ عام تقريبا ..فى بلوجى العزيز متكاظى....ياااه مر عام كامل منذ بدأ بلوج متكاظى ومع مرور العام رأيت انه من المفروض ان تكون لى مدونتى الخاصة
(أبعبع فيها براحتى)


حين بدأت بكتابة هذا البوست (بوست الافتتاح) ..لا اعلم لم تبادر الى ذهنى صورة زوجة شيخ الصيادين حنفى فى فيلم ابن حميدو وهيا تدشن اقلاع السفينة العظيمة نورماندى تو ( ربنا ميجعل مصير البلوج زى نورماندى تو كده ) وهيا تقول سيرى على بركة الله مجراكى ..ومرساكى


وفى النهاية أحب أقول ان اى حد هيدخل هنا .., ويقرى اللى انا كاتبه .., هيبقى بيقرى حتة منى ..ومعنى ان انا سمحت بكده .., يبقى انتو كمان حتة منى .., وفى عالم البلوجرية ..عالم الحرية السيبرية .., كل اللى نفسه فى حاجة يقولها .., واللى مش عاجبه كلامى يقول .., وبما انى ديموقراطى (ديموقراطية ليها انياب يا جيهان ) فانا مش عامل موديريشن للتعليقات


جرى ايه يا ميخا ..هو الواد ده هيعيش ولا ايه ؟؟..مينجز أم البوست ده ويخلصنا


وعلشان خاطر ميخا ميزعلش ..خلاص هنجز أم البوست واخلص كلام ..مع انى مش عايز اسيبكم والله


شوف يا اخى التثبيت ..أنا اتخنقت من الواد ده يا ميخا ..متيجى نحرقله البلوج ده


خلاص يا عم انا ماشى .. بس فاضل كلمتين بس


قول وخلصنا يا عم الخنيق .. متـقوول يااض


فى النهاية عايز اقول تنبيه مهم ..بس انزلو تحت علشان يكون من اول السطر

تنبيه هام : تعلن ادارة البلوج (المكونة منى انا ونفسى العزيزة ) عن ان اى تشابه بين الشخصيات التى ستذكر فى البلوج وأى شخصية رئاسية أو وزارية او توريثية أو حنجورية هو من صميم فكرة البلوج ومقصود تماما ..وان اى اعتراض سيعرض صاحبه للمساءلة القانونية ..وأحذر من ان البلوج قد يحتوى على مواد غير مناسبة لمن هم تحت سن 18 سنة ..لذا يرجى ترك البطاقة قبل الدخول



 
posted by zordeak
Permalink ¤