Monday, October 22, 2007,5:10 PM
التــــــاج السلــطــانى
التاج المرة دى جالى من مـــــــــــــى والجديد فى التاج ان هيا اللى مألفاه
التاج حلو فعلا وأسئلته لذيذة جدا .., إتأخرت كتير فى الاجابة بس المهم انى جاوبته
شكرا يا مى عالتاج .., ونبدأ على طول فى التاج اللى بيقول
.
.
.
.
لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟ اشمعنى العصر ده؟؟
اممممممم .., سؤال جميل .., انا لو هختار كنت هختار عصر محمد على باشا
اللى يدقق فى العصر ده هيكتشف ان فيه حاجات كتير الواحد كان بيحلم بيها .., اول حاجة ان الشعب هو اللى اختار محمد على .., الشعب هو اللى عزل الوالى العثمانى خورشيد باشا وعين مكانه محمد على والى على مصر .., وده من اول مبادىء الديمقراطية .., ان الشعب هو اللى يحدد مين يحكمه
تانى حاجة ان محمد على كان قائد ذكى جدا وكان عارف قيمة مصر وعلشان كده بدأ فى خطته انه يخلى مصر تستعيد ريادتها وتستعيد هيبتها .., بنى جيش قوى .., فتح الطريق قدام نهضة كانت مصر محتاجاها فى الوقت ده .., كان مؤمن جدا بفايدة التعليم فى رفع الامم .., الراجل ده كان بيحب مصر فعلا وكان مؤمن بيها .., والنهضة الحقيقية فى كل المجالات تقريبا بدأت فى عصره
.
.
.
اول اولويه فى حياتك...عيلتك ...شغلك و لا اصحابك؟؟؟
الاولويات بتختلف حسب التوقيت .., بمعنى ان اللى محتاجنى اكتر المفروض اكون جنبه وقتها .., وبمعنى تانى انى مثلا ممكن يكون عندى امتحان تانى يوم وحد من العيلة يكون عايزنى فى طلب ممكن يتأجل فأكيد ساعتها هتكون الاولوية للمذاكرة اللى هيا شغلى .., الموضوع نسبى جداا وفيه كلام كتير
.
.
.
ايه اكتر حاجه بتحبها فى رمضان؟؟؟؟
هتستغربى لو قلتلك ريحته .., بحس ان رمضان بيكون له ريحة مميزة بحبها جدا ., مش شرط تتشم .., هيا حاجة بتتحس .., خليط من ذكريات جميلة عشناها كلنا فى رمضان ., قرب من ربنا وطمع فى العتق من النار .., جو جميل بالذات عندنا هنا فى مصر ..,شعور بالتسامح وحب الخير .., يمكن محستش بمعظم الحاجات دى السنة دى لانى كنت بمتحن .., بس ربنا يحيينا لرمضان الجاى علشان ارجع احس بيه زى زمان
.
.
.
اوصف ليا اجمل فطار ممكن تفطره
ده انا المفروض احكى انواع الاكل ولا ايه كده يبقى مش هنخلص النهاردة :)
لا انا هتكلم ان احلى فطار افطره هيكون اول فطار ليا فى بيتى انا مع الانسانة اللى بحبها ..., هيكون اول رمضان لينا سوا فى بيتنا .., اول يوم نفطر فيه سوا وندعى لبعض .., اول فطار من ايديها .., اول يوم ادخل عليها المطبخ واطمن عالاكل بعد ما كنت بدخل على ماما اللى اكيد زهقت من مضايقتى ليها كل يوم قبل الفطار .., اكيد ده هيكون احلى فطار
.
.
.
لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
الاجابة صعبة طبعا .., انا هحاول على قدر المستطاع وهخلى الحكم ان كنت عادل ولا لأه للمجموعة اللى هكون حاكم عليها .., ويوم ما احس انهم بيمدحونى وخايفين ينقدونى هعرف ساعتها انى حاكم ظالم
قال الحسن البصري في وصف الحاكم العادل: إن الله جعل الإمام العادل قوام كل مائل وقصد كل جائر وصلاح كل فاسد وقوة كل ضعيف ونصفة لكل مظلوم ومفزع كل ملهوف، وهو القائم بين الله وبين عباده، يسمع كلام الله ويسمعهم، وينظر إلى الله ويريهم،وينقاد إلى الله ويقودهم، وهو كالعبد الذي ائتمنه سيده وإستحفظه ماله وعياله، وهو الذي لا يحكم في عباد الله بحكم الجاهلية ولا يسلك بهم سبيل الظالمين، ولا يسلط المستكبرين على المستضعفين، فهو وصي اليتامى وخازن المساكين يربي صغيرهم ويمون كبيرهم
.
.
.
اللى بيبوظ الحكام ...نفسهم و لا الشعب و لا الحاشيه المقربه؟؟؟
انا فى رأيى ان اكتر حاجة بتبوظ الحاكم هى ان يكون شعبه جبان او جاهل .., لان الشعب الجبان بيخاف يدافع عن حقه والشعب الجاهل ميعرفش اصلا ايه هو حقه
.
.
.
مين اكتر اعلامى مصرى بتحترمه؟؟؟
وائل الابراشى من اكتر الصحفيين والاعلاميين اللى بحس فعلا انهم محترمين ومش مستنيين حاجة من حد
.
.
.
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟؟
الصراحة مقريتوش لسه بس هقراه ان شاء الله فى اقرب وقت
ده اعلان ده ولا ايه
;)
.
.
.
لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
حاجات كتيييير .., يعنى مثلا زمان كان نفسى ابقى طيار
دلوقتى نفسى ابقى كاتب روايات .., كلها احلام وقتية لذيذة وبعدين برجع للواقع انى هبقى دكتور فبحلم ابقى دكتور كبير واكون كويس فى الحاجة اللى انا هختارها .. بس
.
.
.
تانى بلد تتمنى تعيش فيه بعد مصر ايه؟؟؟
المدينة المنورة .., اتمنى ان اخر جزء فى حياتى اقضيه هناك
.
.
.
اوصف ليا ترتيبات اجمل فرح ممكن تحضره
امممممم ., الحاجات دى البنات بيفهمو فيها اكتر :)
بس انا بالنسبة لى الفرح بيبقى حلو لما الناس اللى حاضرين فيه يكونو حلوين وبيحبو بعض .., مش يكون اهل العروسة كارهين اهل العريس واهل العريس مش طايقين اهل العروسة والعروسة مش طايقة العريس والمعازيم كارهين بعض .., الفرح ده لو اتعمل فى احلى فنادق الدنيا واحسن ترتيبات .., اكيد هيكون فرح بايخ جدا ودمه تقيل
انما الفرح لما يكون لاتنين بيحبو بعض وعارفين ان دى اول لايلة فى بداية عمرهم اللى جى ونفسهم يبدأوها صح .., اكيد هيكون فرح رائع
اكيد لما يكونو عارفين ده هيحاولو ميعملوش حاجات تغضب ربنا ومش هيروحو يجيبو رقاصة علشان تحييلهم الفرح
والقاعدة اللى بحبها فى كل حياتى ان البساطة فى كل حاجة بتحليها
.
.
.
بتراعى كلام الناس و القيل و القال؟؟؟ لو اه او لو لا قلى ليه؟؟؟
أكيد فى اوقات كتير براعى كلام الناس لما يكونو بيتكلمو فى حاجة صح .., يعنى احنا عايشين فى مجتمع بيقبل تصرفات معينة وميقبلش تصرفات تانية لانها اما منافية للدين او للذوق .., فى الحالة دى انا هحترم كلامهم لما يعلقو على حاجة معينة .., انما لما يكون كلامهم قائم على تجريح الاخرين او الانقاص من حريتهم او لمجرد الحقد فانا ساعتها هضرب بكلامهم اقرب حيطة .., واقول الكلمة المفضلة
طـــظ
لان الناس فى اوقات كتير بيبقو مجرد غوغاء يتكلمو فى حاجات ميفهموش فيها حاجة ابقى انا غلطان ساعتها لو خفت على كلامهم او سمعتله حتى
.
.
.
صحيت ملقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟؟
هتخنق جداااااااااااااااااااا
وهنام تانى علشان اصحى والاقى الحاجات دى
دى تقريبا بقت من مقومات الحياة فى وقتنا ده
.
.
.
السعاده هى.....؟
الرضا بما قسمه الله والوثوق بأن الرزق بيد الله .., وتقبل القدر خيره وشره بقولة الحمد لله
.
.
.
عندك امل؟؟؟ اسبابك؟؟؟
اه طبعا
اسبابى ايمانى بربنا .., لانه شايفلى الخير فين وهيهدينى ليه .., ولانى لو كنت شايف ان المشكلة اللى حصلتلى فى وقت معين ..لو كنت شايفها حاجة وحشة .., هييجى الوقت اللى اكتشف فيه انها كانت لمصلحتى .., يبقى لازم اكون واثق فى ان ربنا مش عايزلى غير الخير
لازم يكون عندى أمل علشان ربنا لا يضيع أجر من احسن عملا
.
.
.
لما بتحب تهرب من كل شىء بتروح فين؟؟؟؟
زمان لما كنت احب اهرب من حاجة كنت اجرى على اوضتى .., انزل تحت البطانية .., اغمض عينى .., لازم ميكونش باين منى حاجة .., لو رجلى بانت مثلا من تحت البطانية يبقى كده الهروب باظ .., الحماية التامة لما اكون كلى متغطى
بعد كده الهروب بقى متمثل عندى فى كلمة واحدة
اسكندرية
مشوار بعييد بالقطر او بالعربية بحس انى رميت كل همومى ومشاكلى ورا ضهرى
اقعد بالليل عالبحر واغمض عينى .., اغسل صدرى بهوا البحر
انظم افكارى وافكر بشكل تانى وارجع وانا حليت كل مشاكلى او حتى نسيتها
.
.
.
امتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟
لما دخلت الجامعة وبصيت للناس اللى داخلين جديد واكتشفت ان انا اكبر واحد موجود وان اللى قدى خلصو وفيهم اللى اتجوزو كمان وانا لسه بدرس .., اكتشفت ان انا كبرت فعلا
مع انى كنت لسه لوقت قريب لما اجى افكر فى نفسى افكر فى نفسى كأنى طفل صغير محتاج يلعب ويتنطط
يمكن لانى لحد وقت قريب كنت عايز الزمن يقف ومكبرش تانى علشان خايف من مسؤليات الكبار وتعبهم
الظاهر ان انا كبرت فعلا
.
.
.
لما بتعمل عمل خيرى بيكون ايه هو دافعك الاول؟؟؟
ان ربنا يعوضنى عنه خير فى الجنة .., الهدف التانى اسعاد الحد اللى انا بعمله العمل ده سواء كان طفل معاق او يتيم بروح العب معاه شوية او ام غلبانة ببيعلها هدوم لبناتها بسعر رمزى او مريض بنزوره فى مستشفى بيبقى الهدف ساعتها اننا نفرحهم
.
.
.

بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟
لأ طبعا
بما انى مبشربش فمش هجاوب السؤال تانى
بس انا لما بشوف واحد بيشرب سجاير بقرف منه
لما تكون ست بقرف منها اكتر
مش علشان اسقاطات ذكورية جوايا والكلام الفاضى ده
انما علشان شكلها بيبقى مقرف فعلا
.
.
.
بتعرف ايدك اليمين من الشمال ازاى؟؟؟؟
هههههههههه
سؤال جميل
بحس ان ايدى الشمال أرق من ايدى اليمين
يمكن علشان مبستخدمهاش كتير
كمان ايدى اليمين هيا اللى بتدخل اسهل فى جيبى اليمين .., وجيبى اليمين بقى هوا اللى بيكون فيه الموبايل
فبعرفها بقى كده علشان المفاتيح بتبقى فى جيبى الشمال اللى هو ناحية ايدى الشمال
انما لو بتدورى عالمحفظة فدى بتبقى فى جيبى اللى ورا ومش هتخدمنا فى الحكاية دى
:p
.
.
.
ايه اكتر آله موسيقيه بتحبها؟؟
البيانو
كنت اتمنى ابقى عازف بيانو
حتى صوابع يدى طويلة زى اللى بيعزفو بيانو
لو شفتى بيانو ابقى قوليله انى بحبه بقى
ويا ريت تخليه يمضيلى على اى حاجة
.
.
.
فى رايك ليه الذوق و النخوه انعدموا؟؟؟؟
هو التاج طول كده ليه ؟
احم احم نجاوب عالسؤال
مين قال انهم انعدمو
موجودين والله بس انتى مش واخدة بالك
بس يمكن قلو عن زمان
وبتبقى حسب التربية
انا مثلا ممكن اعدلك كام واحد اعرفه عنده شوية ذوق
وكام حد كمان عندهم شوية نخوة
:D
.
.
.
ايه الحاجه اللى لو حصلتلك تبقى سعيد اوى؟؟؟
ان ربنا يجمعنى على خير بالبنت اللى قلبى اختارها
مش هبقى سعيد اوى بس
هبقى سعيد جدااااااااااا
خاااااااااااااااااالص
مااااااااااااااااااالص
:)
.
.
تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟
أختار ابقى عايش مبسوط .., مع واحدة بحبها .., مرتبى مكفينا احنا الاتنين ومعيشنا عيشة محترمة .., عندى عربية معقولة وبيت على مزاجى
بس مش اكتر
واحد صاحبى لما سألته نفسك فى ايه قالى على حاجات زى اللى قلتهالك دى
طلعتله انا لسانى وقلتله ابقى قابلنى يا بنى
انت كده تروح الجنة أسهل
:p
.
.
البحر و لا النيل؟؟؟
البحر
.
.
.
مركب ولا طيارة ؟
طيارة
لانى بخاف انى اكون وسط البحر بالليل وانا مبعرفش اعوم كويس
حد ظريف بقى يقولى افرض الطيارة وقعت بيك فى البحر بالليل
هقوله ابقى انا فقر واستاهل اكتر من كده
.
.
.
مجنون و لا عاقل؟؟
عاقل أتمتع ببعض الجنون
.
.
.
تقرى كتاب و لا تتفرج عليه فيلم؟؟؟
أقراه كتاب طبعا
خيالى هيكون أفضل من أفضل انتاج
ودماغى هتكون احسن من احسن مخرج
.
.
نمرره لمين بقى ؟؟
عماد صاحب قنديل ام هاشم واول تاج ليه .., إسراء الاميرة المفقودة ..,سها رايفندل .., علا من غزة .., طبعا طبعا حبيبى أحمد مبرمج حر .., مى خاطر لانها مجاوبتش التاج اللى ألفته ..هع هع هع .., جوسى فوكيرة .., تسنيم وحكايات من القلب ..,تعبت بجد .., ابيتاف ..,ريموو .., ما عليناا ..,شيماء الصراحة خنقة ..,يا مراكبى معملش تاجات من زمان ..,نوران لو مكانتش عملته ..,سهر الليالىِ
 
posted by zordeak
Permalink ¤